Raqobat qo‘mitasi davlat idoralari tomonidan amalga oshirilgan 23 milliard so‘mdan ortiq qiymatdagi davlat xaridlarida jiddiy qonunbuzilish holatlarini aniqladi. Tekshiruvlar natijasida uchta yirik davlat tashkilotining tanlov savdolarida shaffoflik ta’minlanmagani va raqobat cheklangani ma’lum bo’ldi.
Qo’mita tomonidan doimiy ravishda olib boriladigan monitoring va tahlillar davomida quyidagi davlat muassasalari o’tkazgan tenderlarda kamchiliklar qayd etilgan:
- Yoshlar ishlari agentligi: Umumiy qiymati 9,1 mlrd so‘mdan ortiq bo’lgan 6 ta tanlov savdosi.
- Innovatsion rivojlanish agentligi: Qariyb 8 mlrd so‘m mablag’ sarflangan 6 ta xarid.
- Maktabgacha va maktab ta’limi vazirligi: 6,7 mlrd so‘mga yaqin hisoblangan jami 10 ta tanlov savdosi.
Qaysi qonun talablari buzilgan?
Ushbu uchala holatda ham buyurtmachi tashkilotlar tomonidan «Raqobat to‘g‘risida»gi qonunning 29-moddasi talablariga rioya qilinmagan. Ya’ni xarid jarayonlarida adolatli muhit yaratilmagan, ishtirokchilar o’rtasidagi raqobatni cheklaydigan yoki cheklashga olib kelishi mumkin bo‘lgan harakatlarga yo’l qo’yilgan.
Qanday jazo choralari ko’riladi?
Aniqlangan qonunbuzilish holatlari yuzasidan Raqobat qo‘mitasining Maxsus komissiyasi yuqoridagi buyurtmachi tashkilotlarga nisbatan maxsus ish qo‘zg‘atdi.
Idoralarga xatoliklarni zudlik bilan bartaraf etish va kelgusida bunday holatlarga yo‘l qo‘ymaslik bo‘yicha bajarilishi majburiy bo’lgan ko‘rsatmalar berildi. Bundan tashqari, xaridlar uchun mas’ul bo’lgan mansabdor shaxslarga nisbatan ma’muriy javobgarlik choralarini qo‘llash maqsadida barcha tegishli materiallar sud organlariga yuborilgan.
