Hamas tomonidan 2023-yil 7-oktabr hujumlari chog‘ida qo‘lga olingan qolgan isroillik garovdagilar dushanba kuni ertalab ozod qilinishi kutilmoqda, deb xabar berdi Isroilning garovdagilar bo‘yicha koordinatori. Bu haqda Forbes nashri ma’lum qildi.
Biroq AQSh vitse-prezidenti Jey Di Vans yakshanba kuni “Meet the Press” dasturida bu jarayon “istalgan daqiqada boshlanishi mumkin”ligini aytdi.
Isroil ma’lumotlariga ko‘ra, G‘azo sektorida 48 nafar garovda qolgan shaxs bor, biroq ularning faqat 20 nafari tirik ekani taxmin qilinmoqda.
Juma kuni Isroil qo‘shinlari G‘azoning ayrim hududlaridan chiqib ketganidan so‘ng e’lon qilingan otashkesim kelishuvi doirasida Hamas 72 soat ichida garovdagilarni ozod etishga rozi bo‘lgan edi. Bu esa dushanba uchun muddat belgilaydi.
Kelishuvning bir qismi sifatida Isroil 250 nafar falastinlik mahbusni ozod qiladi.
Isroil tashqi ishlar vaziri o‘rinbosari Sharren Haskel esa Sky News kanaliga bergan intervyusida garovdagilar “hatto bugun kechqurun” ozod etilishi mumkinligini bildirdi.
Vitse-prezident Vansning so‘zlariga ko‘ra, Prezident Donald Trump garovdagilar ozod qilingach, ularni “shaxsan kutib olish” uchun Isroil va Misrga yo‘l oladi. Shu bilan birga, u AQSh qo‘shinlari G‘azoga kiritilmasligini ham tasdiqladi.
Trump, shuningdek, Misrning Sharm ash-Shayx shahrida bo‘lib o‘tadigan G‘azo tinchlik sammitida ishtirok etadi. U bu anjumanni Misr prezidenti Abdul Fattah as-Sisiy va yana 20 davlat rahbarlari bilan birgalikda boshqaradi.
Trump ma’muriyati sentyabr oyida G‘azo uchun 20 banddan iborat tinchlik rejasini e’lon qilgan edi. Reja bosqichma-bosqich amalga oshiriladi: dastlab Hamas garovdagilarni ozod etadi, keyingi bosqichlarda esa qurolsizlanadi va G‘azoni boshqarishdan butunlay voz kechadi.
Kelishuvga ko‘ra, Hamas a’zolariga amnistiya beriladi yoki mamlakatni tark etishga ruxsat etiladi.
G‘azoni boshqarish esa “Tinchlik kengashi” tomonidan tanlanadigan falastinlik va xalqaro mutaxassislar qo‘mitasiga topshiriladi.
Isroil juma kuni qo‘shinlarini G‘azodan qisman olib chiqdi, va shundan so‘ng minglab gazoliklar o‘z uylariga qayta boshladi, deb xabar berdi Reuters.
