AQSh prezidenti Donald Tramp Rossiya rahbari Vladimir Putin bilan yana bir uchrashuv o‘tkazishini ma’lum qildi. Bu haqda Bloomberg nashri xabar bermoqda. Qaror birinchi sammit natija bermaganidan keyin qabul qilingan.
Tramp Putinga ikki soatdan ortiq davom etgan telefon suhbatidan so‘ng bu tashabbusni urushni tinch yo‘l bilan tugatish uchun navbatdagi qadam sifatida ko‘rsatgan. Biroq tahlilchilarga ko‘ra, bu qaror Kremlga nisbatan bosimni kamaytiradi va Putinga vaqt yutish imkonini beradi.
Shu bilan bir paytda, Tramp juma kuni Ukraina prezidenti Vladimir Zelenskiy bilan uchrashadi. So‘nggi haftalarda u Zelenskiyga nisbatan iliqroq munosabat bildira boshlagan, biroq 16-oktabr kuni u Tomahawk raketalarini yuborish va Rossiyaga qarshi yangi sanksiyalar masalasida aniq pozitsiyani bildirmadi.
Kreml ma’lumotiga ko‘ra, Putin Tramp bilan suhbatda AQShning Ukrainaga uzoq masofali raketalar berishi ikki davlat o‘rtasidagi munosabatlarga jiddiy zarar yetkazishini ogohlantirgan.
Ekspertlar bu qarorni xavfli deb baholamoqda. Jons Hopkins universiteti professori Sergey Radchenkoning ta’kidlashicha, Alyaskadagi sammit hech qanday natija bermagan bo‘lsa-da, yana uchrashuv o‘tkazish — siyosiy jihatdan xavfli qadam.
“Putin bu jarayondan foyda ko‘rib, Trampni qurollar yetkazib berishni kechiktirish va energiya sanksiyalarini cho‘zishga majbur qilmoqda”, — deya fikr bildirgan Markaziy strategik va xalqaro tadqiqotlar markazi (CSIS) mutaxassisi Mariya Snegovaya.
Tramp va Putinning navbatdagi uchrashuvi Budapeshtda o‘tishi rejalashtirilgan. Tahlilchilar bu joy tanlovini Yevropa ittifoqi davlatlari orasida ishonchsizlik uyg‘otuvchi omil deb baholamoqda, chunki Vengriya bosh vaziri Viktor Orban Rossiya bilan yaqin aloqalari sababli NATO va Yevropa ittifoqi tomonidan tanqid qilinmoqda.
Yevropa kuzatuvchilari fikricha, bu uchrashuv Rossiya va AQSh o‘rtasidagi yangi siyosiy o‘yinlar davrining boshlanishi bo‘lishi mumkin.
