Markaziy bank tijorat banklari va to‘lov tizimlariga bankomatlar faoliyatini yaxshilash hamda mijozlar huquqlarini himoya qilish bo’yicha qat’iy ko‘rsatmalar berdi. Endilikda pul berilmasdan hisobdan yechilishi yoki karta qolib ketishi kabi muammolarda banklar mas’uliyatni bir-biriga yuklay olmaydi va mijozlar idorama-idora sarson qilinmaydi.
Mijozlar orasida bank kartasidan pul yechilib, naqd pul berilmasligi, amaliyot muvaffaqiyatsiz yakunlansa ham xizmat haqi ushlab qolinishi ko’p kuzatilayotgan edi. Eng yomoni, karta bankomatda qolib ketgan holatlarda tijorat banklari va to‘lov tashkilotlari muammoni tezkor hal etish o‘rniga, javobgarlikni bir-biriga to’nkash holatlari yuzaga kelayotgan edi. Markaziy bank bunga chek qo’yish maqsadida qator tavsiya va talablarni kiritdi.
Yangi tartib nimalarni o’zgartiradi?
- Aniq yo’riqnoma va shaffof komissiya: Bankomatlarda nosozlik yuzaga kelganda mijoz nima qilishi kerakligi haqidagi ketma-ketlik aniq ko‘rsatib qo’yilishi shart. Xizmat haqlari bo‘yicha ma’lumotlar ham oldindan va ochiq taqdim etilishi kerak.
- Murojaatlarga ustuvorlik: Pul berilmasligi yoki kartani ushlab qolish kabi shikoyatlar birinchi navbatda ko’rib chiqiladi. Mijozga murojaati qabul qilinganini tasdiqlovchi maxsus identifikatsion raqam beriladi.
- Komissiya avtomatik qaytariladi: Agar bankomatdagi operatsiya muvaffaqiyatsiz yakunlansa, mijozdan ushlab qolingan vositachilik haqi (komissiya) ortiqcha savol-javobsiz, avtomatik ravishda qaytarib berilishi shart.
Mijozni bankka chaqirish man etildi
Eng muhim qulayliklardan biri: agar muammoni bankning o’z ichki tizimlari (kuzatuv kameralari videolari, inkassatsiya dalolatnomalari) yordamida hal qilish imkoni bo‘lsa, mijozlarni bank ofisiga qayta chaqirish qat’iyan taqiqlanadi. Muammo masofadan, mijozning ishtirokisiz hal qilinishi kerak.
Finpress avvalroq davlat xaridlaridagi qonunbuzarliklar haqida ma’lum qilgan edi.
